“Kəpəz”ə baş məşqçi təyin olundu: Adil Şükürov yenidən “sarı-göylər”də!
90plus.az xəbər verir ki, Azərbaycan Premyer Liqasında çıxış edən “Kəpəz” klubu tanınmış yerli mütəxəssis Adil Şükürovu gətirdiyini rəsmi şəkildə açıqlayıb.
Adil Şükürovla 2 illik müqavilə imzalanıb. O, bu postda Azər Bağırovu əvəz edib.
Bu təyinat Şükürov üçün “Kəpəz”ə qayıdış deməkdir. Təcrübəli mütəxəssis 2023-cü ilin noyabrından 2024-cü ilin avqust ayına qədər də komandaya rəhbərlik etmişdi. Onun rəhbərliyi altında “Kəpəz” çətin dövrdən keçsə də, oyun üslubunda və nəticələrdə nisbi stabillik müşahidə olunmuşdu.
Kəpəzlə bağlı zəngin keçmiş
Adil Şükürovun “Kəpəz”lə əlaqələri təkcə məşqçi fəaliyyəti ilə məhdudlaşmır. O, klubun tarixində həm də futbolçu kimi iz qoymuş isimlərdən biridir. 1999/2000-ci illər mövsümündə “Kəpəz”in heyətində çıxış edən Şükürov həmin mövsümdə Azərbaycan çempionatının gümüş medalını qazanıb və Azərbaycan Kubokunun qalibi olub.
Yeni mövsüm öncəsi klubun yenidən qurulması və nəticələrin yaxşılaşdırılması məqsədilə bu addımın atıldığı bildirilir. Klub rəhbərliyi Şükürovun həm yerli futbolu dərindən tanıması, həm də “Kəpəz” ruhuna bağlılığı səbəbindən bu təyinatın müsbət nəticələr verəcəyinə inanır.
Yaxın günlərdə məşqlərə start veriləcək
“Kəpəz” yay təlim-məşq toplanışına yaxın günlərdə start verəcək. Adil Şükürovun rəhbərliyi altında komandanın heyətində dəyişikliklərin də olacağı gözlənilir. Yeni transferlərin və hazırlıq planının yaxın günlərdə ictimaiyyətə təqdim olunacağı bildirilib.
