Afrika Millətlər Kubokunun son 16 mərhələsində dramatik qarşılaşma yaşanıb. Mali azlıqda qalmasına və oyunun sonlarında geri düşməsinə baxmayaraq, penaltilər seriyasında Tunisə qalib gələrək 1/4 finala yüksəlib.

90plus.az xəbər verir ki, oyun Mərakeşdə yerləşən Məhəmməd V Stadionunda baş tutub. Qarşılaşmanın 26-cı dəqiqəsində Malinin futbolçusu Kulibali qırmızı vərəqə alaraq komandasını azlıqda qoyub. Say üstünlüyündən istifadə edən Tunis 88-ci dəqiqədə Şaovatın qolu ilə hesabda önə çıxıb.

Matçın taleyi son anda dəyişib. 90+6-cı dəqiqədə VAR baxışından sonra Malinin xeyrinə penalti təyin olunub və Sinayoko dəqiq zərbə ilə hesabı bərabərləşdirib – 1:1. Əsas vaxt və əlavə 30 dəqiqə ərzində başqa qol qeydə alınmadığı üçün qalib penaltilər seriyasında müəyyənləşib.

Penalti seriyasında Tunisdə Nene zərbəni dəqiq yerinə yetirə bilməyib. Malinin son penalti zərbəsini isə El Bilal Ture uğurla icra edərək komandasına qələbə qazandırıb. Nəticədə Mali penaltilərdə 4:2 hesabı ilə üstün gələrək 1/4 finala yüksəlib.

Beləliklə, Mali turnirdə yoluna davam edir, Tunis isə Afrika Millətlər Kuboku ilə vidalaşıb.