Ben Ceykobsa görə, Aleksandr İsak “Liverpul”a keçidə açıqdır və təklif gəlsə, bunu müsbət qarşılayacaq. Lakin bəzi mənbələrdə iddia olunduğu kimi, futbolçunun “Liverpul”la şəxsi razılığa gəldiyi barədə xəbərlər həqiqəti əks etdirmir.

90plus.az xəbər verir ki, “Mersisayd” klubu artıq İsakın nümayəndələri ilə ilkin təmas qurub və “Nyukasl”a onun transferi üçün Britaniya futbolu tarixindəki rekord məbləği ödəməyə hazır olduqlarını bildirib. “Liverpul”un hazırda Premyer Liqanın Mənfəət və Davamlılıq Qaydaları (PSR) çərçivəsində maliyyə baxımından kifayət qədər əlverişli mövqedə olduğu vurğulanır.

 Luis Diasın satılması və Darvin Nunyesin gözlənilən ayrılığı daxil olmaqla, mümkün transferlər klubun böyük bir transfer üçün vəsait toplamasına şərait yarada bilər.

Buna baxmayaraq, “Nyukasl” İsakı komandada saxlamağa ümid edir və ona yeni müqavilə təklif etmək niyyətindədir. Lakin maaş tələbləri hələlik əsas maneə olaraq qalır.

İsakın həftəlik 300 min funt maaş istədiyi bildirilir. Mənbələrin məlumatına görə, o, ötən il müqaviləni uzatmağa hazır idi, lakin klub tərəfindən rəsmi təklif gəlməyib.

Danışıqların dayandığı və futbolçunun hələ də masa arxasına oturmağa meyil göstərmədiyi bir vaxtda, “Nyukasl” artıq onun mümkün gedişinə görə alternativlər axtarır.