“Şalke 04” Edin Ceko ilə razılıq əldə edib

90plus.az xəbər verir ki, Almaniyanın “Şalke 04” klubu təcrübəli hücumçu Edin Ceko ilə tam şifahi razılıq əldə edib. İdman direktoru və baş icraçı direktor Frank Baumann, eləcə də baş məşqçi Miron Muşliçin apardığı danışıqlardan sonra 39 yaşlı forvard “Şalke 04”ün layihəsinə qoşulmağa razılıq verib.

Hazırda “Şalke 04” ilə “Fiorentina” arasında transferin rəsmiləşdirilməsi üçün danışıqlar davam edir. Razılaşmanın tamamlanması üçün klublar arasında yekun razılaşmanın əldə olunması qalır.

Məlumata görə, Edin Ceko “Şalke 04”ün dərhal Bundesliqaya qayıtmaq hədəfini cəlbedici hesab edir və bu məqsəd uğrunda komandaya töhfə verməyə hazırdır. Klub 2-ci Bundesliqada yüksəliş uğrunda mübarizə aparır.

Bosniyalı hücumçu bu mövsüm “Fiorentina”nın heyətində bütün turnirlərdə 18 oyunda 2 qol vurub. Ötən mövsüm isə “Fiorentina” forması ilə 53 matçda 21 qola imza atmışdı. Edin Cekonun İngiltərə, İtaliya, Almaniya və Türkiyə kimi aparıcı liqalarda klub karyerasında vurduğu qolların sayı 300-ü ötüb.