“Liverpul”un baş məşqçisi Arne Slot komandasının UEFA Çempionlar Liqasının 1/8 final mərhələsində “Qalatasaray”a qarşı keçirəcəyi oyunlar barədə danışıb.

90plus.az xəbər verir ki, bu gün UEFA tərəfindən keçirilən püşkatma mərasimində “Liverpul” Türkiyə təmsilçisi ilə cütləşib. Bu mövsümün əvvəlində mersisaydlılar səfərdə “Qalatasaray”a 0:1 hesabı ilə məğlub olmuşdu və Slot qarşıdakı qarşılaşmanın çətin keçəcəyini etiraf edib.

“Mümkün variantları nəzərə alsaq, gözlədiyimizi aldıq: bu mövsüm artıq qarşılaşdığımız rəqibə qarşı çətin 1/8 final cütlüyü,” – deyə Slot bildirib.

“Bilirik ki, sentyabrda İstanbulda göstərdiyimiz performansdan daha yaxşı oynamalıyıq, xüsusilə də səfər matçında. Bu, əsas çağırışımızdır. Üstəlik, ‘Qalatasaray’ 1/8 finala yüksəlmək üçün ‘Yuventus’a qarşı çox güclü nəticə əldə edib.”

“Ən əsası isə həyəcan hissidir. Çünki qrup mərhələsində məhz bunun üçün çox çalışmışıq. Burada olmaq istəyirdik və indi bu fürsətdən maksimum yararlanmaq niyyətindəyik,” – deyə o əlavə edib.

“Əlbəttə, Çempionlar Liqası yenidən başlamazdan əvvəl digər turnirlərdə də vacib oyunlarımız var. Ümid edirəm ki, vaxtı çatanda tam hazır vəziyyətdə olacağıq,” – deyə Slot sözlərini yekunlaşdırıb.

Qeyd: 1/8 final mərhələsinin oyunları martın 11 və 18-də (ev-səfər formatında) baş tutacaq!