İngiltərə Liqa Kubokunun dördüncü raundunda “Kristal Pelas”a 0:3 hesabı ilə məğlub olaraq turnirlə vidalaşan “Liverpul”da baş məşqçi Arne Slot heyət seçimi ilə bağlı edilən tənqidlərə cavab verib.

90plus.az xəbər verir ki, hollandiyalı mütəxəssis oyunsonrası mətbuat konfransında gənc və rotasiyalı heyətlə meydana çıxmasının səbəbini izah edib:

“Son bir neçə həftədə demək olar ki, hər iki gündən bir, xüsusilə də çətin Avropa oyunlarından sonra meydana çıxmışıq. Qarşıdakı həftə bizim üçün çox vacib olacaq, klub və azarkeşlər üçün də. Ona görə mümkün qədər çox oyunçunu sağlam saxlamaq istəyirik.”

Slot əlavə edib ki, qərarı həm zədələrin çoxluğu, həm də klubun illərdir Liqa Kubokunda akademiya oyunçularına şans vermə ənənəsi ilə bağlı olub:

“Bu gün heyətə baxsanız, görərsiniz ki, son günlər çox oynayan futbolçulara istirahət verdim. Onsuz da bir neçə zədəmiz var. Belə vəziyyətdə bu qərar mənə ən doğru seçim kimi göründü. Klub həmişə bu turnirdə gənc oyunçulara oynamaq imkanı verib. İnsanlar elə bilirlər ki, bizim heyət çox genişdir, amma bu, həqiqətə tam uyğun deyil.”

Mütəxəssis həmçinin bildirib ki, əsas oyunçuları riskə atmaq istəməyib:

“Əgər Vircil (van Deyk) və ya İbu (Konate) oynasaydılar və onlardan biri zədələnsəydi, hamı deyəcəkdi ki, ‘nə qədər səhv qərar’. Üstəlik, əsas heyətlə belə ‘Kristal Pelas’ kimi rəqibləri məğlub etmək asan deyil.”

“Liverpul” bu nəticə ilə Liqa Kubokuna 1/8 final mərhələsində vida edib, “Kristal Pelas” isə turnirdə növbəti mərhələyə yüksəlib.