İspaniya Kuboku matçı öncəsi qalmaqallı hadisə baş verib. "Atletiko Madrid"in komanda avtobusu "Barselona" ilə oyun üçün stadiona çatarkən hücuma məruz qalıb.
90plus.az xəbər verir ki, hadisə "Kamp Nou" stadionunun girişində baş verib. COPE radiosunun yaydığı məlumata görə, avtobusun şüşəsi "Barselona"nın ultra azarkeş qrupu tərəfindən sındırılıb. Azarkeşlərin stadion ətrafında yüksək səslə şüarlar səsləndirdiyi və mahnılar oxuduğu bildirilir.
"Atlétiko Madrid" komandasını daşıyan avtobus stadion ərazisinə daxil olarkən zərərin aydın şəkildə göründüyü qeyd olunur. Xoşbəxtlikdən, futbolçular, məşqçilər heyəti və sürücülər arasında xəsarət alan olmayıb.
Təhlükəsizlik qüvvələri və klub rəsmiləri dərhal müdaxilə edərək "Atletiko Madrid" nümayəndə heyətinin stadiona təhlükəsiz şəkildə daxil olmasını təmin ediblər.
Hadisə ictimaiyyət və futbol camiəsi tərəfindən qəbuledilməz zorakılıq aktı kimi qiymətləndirilib. Bir çoxları insidentin operativ şəkildə araşdırılmasını və məsul şəxslərin cəzalandırılmasını tələb edir.
Qarşılaşma isə planlaşdırıldığı kimi "Barselona" ilə "Atletiko Madrid" arasında keçirilib.
