Azərbaycan Kubokunun 1/8 finalında “Baku Sportinq” üzərində 1:0 hesablı qələbə qazanan “Şamaxı”nın baş məşqçisi Ayxan Abbasov matçdan sonra oyun və komandanın vəziyyəti barədə danışıb.
90plus.az xəbər verir ki, Abbasov: “Əsas məqsəd mərhələni keçmək idi və bunu bacardıq” deyə vurğulayıb.
Mətbuat konfransında çıxış edən Abbasov ilk olaraq oyunun gözlədikləri kimi çətin keçdiyini vurğulayıb:
“I Liqa komandalarına qarşı görüşlər həmişə mürəkkəb olur. İlk hissədə bir qədər passiv idik, çünki gənclərə və az oynayan futbolçulara şans vermək istəyirdik. Onların bu tempə uyğunlaşması asan deyil. Fasilədən sonra dəyişikliklərlə dinamikanı artırdıq. Rəqibin son oyunlarına baxmışdıq, yaxşı müdafiə olunur və çox qaçırdılar. Məqsədimiz kubokda addımlamaqdı, bunu da həyata keçirdik.”
“Arxayın deyildik – belə oyunlarda hər an nəsə baş verə bilər”
Abbasovun oyunu sakit izləməsi barədə verilən sual baş məşqçini gülümsədib:
“Yox, qətiyyən arxayın deyildik. Müdafiəni yarmaq üçün səbr lazımdırdı. Çempionatda bizə qarşı bu qədər qapalı oynayan çox az komanda olur. Futbolçulara müəyyən azadlıq vermişdik. Bu cür matçlarda hər şey ola bilər.”
Rəqib futbolçular və U-21 məsələsi
“Baku Sportinq”də diqqət çəkən futbolçu olub-olmadığını cavablandıran Abbasov bildirib:
“I Liqada U-21-ə çağırıla biləcək oyunçuları tanıyıram. Hətta bəzilərini milli komandaya dəvət etməyi də düşünmüşdüm.”
Berdıyevin açıqlamasına münasibət: “Biz nəyisə deyiriksə, millinin xeyrinə deyirik”
Yerli futbolçuların daha çox oynaya biləcəkləri klublara keçməsi barədə dediyi fikirlərə Kurban Berdiyevin cavabı xatırladıldıqda Abbasov mövzunu genişləndirmək istəməyib:
“Dünən qərara aldım ki, bu barədə danışmayacağam. Hər kəsin fikrinə hörmət edirəm. Heç kimə diktə edə bilmərik ki, filankəsi oynat. Amma unutmayaq ki, hamımız azərbaycanlıyıq. Klublarda çalışan yerli məşqçilər də millinin xeyrini düşünür. Biz bir fikir deyiriksə, bu sırf milli komanda üçündür.”
Mümkün rəqib: “Karvan-Yevlax”ı seçərdim"
Son olaraq 1/4 finalda hansı rəqibi istədiyi barədə sualı Abbasov belə cavablandırıb:
“Əlbəttə ki, ‘Karvan-Yevlax’ı istəyərdim.”
