Azərbaycan millisinin baş məşqçisi Ayxan Abbasov Fransa ilə 1:3 hesablı başa çatan qarşılaşmadan sonra mətbuat konfransında geniş açıqlamalar verib. Mütəxəssis həm oyunu, həm də komandanın ümumi durumunu dəyərləndirib.

90plus.az xəbər verir ki, Abbasov ilk olaraq tribunadakı atmosferə toxunub:

“Azarkeşlərin dəstəyi bu gün xüsusi idi”

“Azarkeşlərə təşəkkür edirəm. Ab-hava möhtəşəm idi. Çoxdandır millinin oyununda belə atmosfer olmurdu. Hesabdan asılı olmayaraq futbolçularımızı sona qədər dəstəklədilər. Bu, onlara ruh verdi.”

“Fransaya qol vurmaq belə çətindir"

Baş məşqçi matçı belə dəyərləndirib:

• “Evdə inamlı oynamaq istəyirdik. Bu dəfə daha rahat idik və ilk qolu vurduq. Fransaya qol vurmaq özü böyük işdir.”
• “Şahruddinin zədəsi planlarımızı pozdu. Üçüncü qol zamanı sona qədər dayana bilmədi.”
• “Nəticə üçün səbr lazımdır. İrəliləyiş var, amma itkilərimiz çox idi.”

Gənclərə etimad: “Mustafaya inanırıq”Mustafa Əhmədzadənin oyuna buraxılması ilə bağlı sualı cavablandıran Abbasov:

“Onu göstəriş üçün deyil, inandığımız üçün milliyə dəvət etmişik. Böyük potensialı var.”

“Xəyal Əliyev artıq əsas heyət üzvüdür”

Baş məşqçi iki oyunda startda yer alan Xəyal Əliyevin performansından razı qalıb:

“Xəyal haqq edirdi. İki matçda da yaxşı oynadı. Artıq millinin əsas oyunçularından biridir.”

“Bu seçmə mərhələ inam yaratdı”

Komandanın ümumi çıxışı barədə:

• “Fransanın qrupda olması əvvəlcədən narahatlıq yaratmışdı. 0:10-luq faciə də tez-tez xatırladılırdı.”
• “Bu oyunlar göstərdi ki, hər şeyə qarşı mübarizə aparmaq olar.”
• “Dörd oyunda taktiki olaraq irəliləyiş gördüm. Oyunçuların özünəinamı artdı.

Taktiki qərarlar: “Oyunun axarı Abbası tələb etdi

Hesab 1:3 olarkən verilən dəyişikliklər barədə:

“Xəyal, Qismət, Renat yorulmuşdu. Sağ cinahda Abbası meydanda istədik, çünki təcrübəsi üstünlük verirdi".

“Əsas problem — futbolçuların klublarında oynamamasıdır”.

Mütəxəssis Azərbaycan futbolundakı struktur problemlərə toxunub:

• “D Liqasından qalxmalıyıq. Əvvəlcə orada rəqabət aparmaq vacibdir.”
• “Milli futbolçular klublarında daim oynamasa, millidə çətinlik yaranır.”
• “İtkilər çox idi. Sağ cinahda həll variantı belə çətin tapılırdı.”

Gələcək planlar və AFFA ilə danışıqlar

Baş məşqçinin sözlərinə görə, gələcəklə bağlı qərarlar tezliklə aydınlaşacaq:

“İnşallah. Yaxın zamanda cavablar olacaq. Qrup çətin idi, vaxt az idi. Amma nəyəsə nail olmaq üçün davamlı iş lazımdır.”

“Gələcəyi düşünürük, adaptasiya vaxtı lazımdır”

• “Millətlər Liqasında hücum futbolu vəd etmək çətindir. Hücum üçün müdafiədə etibarlılıq lazımdır.”
• “Zaman az olanda oyunçuları inandırmaq da çətin olur.”

Mətbuatla davranış: “Bu məsələni nəzarətə götürəcəyəm”

Futbolçuların mediaya münasibəti ilə bağlı deyilənlərə Abbasov belə cavab verib:

“Birinci dəfə eşitdim. Lazımi söhbətləri edəcəyik.”

Transfer mövzuları: “Gəlsələr, hamısını Şamaxıya götürərəm".

Məşqçi yarızarafat belə deyib:

“Rza Cəfərovu gətirmək olsaydı, düşünərdik. Bəlkə Rikardonu milliləşdirək?”

Ayxan Abbasov mətbuat konfransını Azərbaycan futbolunun gələcəyi ilə bağlı nikbin notda tamamlayıb:

“Seçmə mərhələ bitdi. İrəliyə baxacağıq.”