“Barselona” klubunun prezidenti Xoan Laporta maliyyə büdcəsinin təsdiqlənməsi ilə bağlı keçirilən iclas zamanı UEFA-nın “Barselona”ya qarşı ciddi sanksiya planladığını açıqlayıb.
90plus.az xəbər verir ki, onun sözlərinə görə, qurum klubu Çempionlar Liqasına buraxmamaqla cəzalandırmaq niyyətində olub.
“UEFA bizi növbəti Çempionlar Liqasına buraxmaq istəmədi”
Laporta çıxışı zamanı bildirib:
“UEFA bizə cəza vermək və növbəti Çempionlar Liqasında iştirakımıza imkan verməmək istəyirdi. Lakin məhz “Barselona”nın Səhmdar Cəmiyyət olmaması və kapital artımı edə bilməməsi faktı, maliyyə feyr-pley qaydalarının pozulmasına görə 60 milyon avroluq cəzanın 15 milyona endirilməsinə kömək etdi. Bu arqument bizi daha ağır sanksiyalardan qorudu.”
Laporta əlavə edib ki, klubun hüquqi statusu — yəni ictimaiyyətə açıq səhmdar cəmiyyət (S.A.) olmaması — maliyyə manevrləri baxımından məhdudiyyət yaratsa da, bəzi hallarda qoruyucu rol da oynaya bilər.
UEFA-dan sanksiya təhlükəsi
Xatırlatma: “Barselona” son illərdə UEFA-nın maliyyə feyr-pley tələblərini pozduğu iddiaları ilə dəfələrlə gündəmə gəlib. Kluba qarşı araşdırmalar aparılıb və 2023-cü ildə UEFA tərəfindən 60 milyon avro məbləğində cəza nəzərdə tutulsa da, bu sonradan 15 milyon avroya endirilib.
