İspaniyanın nəhəng klubu “Barselona” müqaviləsi mövsümün sonunda başa çatacaq 37 yaşlı hücumçusu Robert Levandovskinin yerinə yeni hücumçu axtarışına çıxıb.
90plus.az xəbər verir ki, kataloniya təmsilçisi bu məqsədlə “Bayern Münhen” klubunda çıxış edən İngiltərə millisinin üzvü Harri Keyni transfer siyahısına daxil edib.
“Guardian” nəşrinin məlumatına görə, “Barselona” rəhbərliyi təcrübəli Levandovskinin boşluğunu dünya futbolunun ən məhsuldar hücumçularından biri ilə doldurmaq istəyir.
Transfer üçün “qızıl fürsət”
Bu keçidi mümkün edən əsas amil Harri Keynin müqaviləsində yer alan azad agent olma maddəsidir. İngilis forvardın “Bayern” ilə müqaviləsindəki 62 milyon avroluq bəndin 2025-ci ilin iyununda aktivləşəcəyi bildirilir. Bu isə “Barselona” üçün ciddi fürsət pəncərəsi yaradır.
Möhtəşəm statistika
Harri Keyn 2023-cü ilin avqustunda “Tottenhem”dən “Bayern Münhen"ə 110 milyon avro qarşılığında transfer olunmuşdu. O vaxtdan bəri 113 oyunda 108 qol vuraraq inanılmaz göstəriciyə imza atıb.
Sentyabr ayında Avropanın beş böyük liqasında bir klub forması ilə 100 qola ən sürətli çatan futbolçu unvanını qazanan Keyn, həmçinin may ayında “Bayern"in Bundesliqada çempionluğu yenidən qazanmasında əsas pay sahibi olub.
