Çempionlar Liqasında 2025/26 mövsümünün 1/8 final rövanşında “Bayern Münhen” öz meydanında İtaliya təmsilçisi “Atalanta”nı qəbul edəcək. Bavariya klubunda qapıçı məsələsi ciddi sual işarəsi yaradıb.

90plus.az xəbər verir ki, "Bayern Münhen"in A komandasındakı üç əsas qapıçının hamısı zədələnib: təcrübəli Manuel Noyerin bərpası davam edir, Sven Ulyrayx “Bayer Leverkuzen”lə oyunda zədə alıb, Jonas Urbik isə Atalanta ilə ilk oyundakı toqquşma səbəbilə hələ oynayıb-oynamayacağı məlum deyil.

Buna görə klub 16 yaşlı gənc qapıçısı Leonard Preskottu UEFA-ya bildirdiyi siyahıya daxil edib. Alman mətbuatının məlumatına görə, Preskott bu oyunda meydana çıxarsa, A komandadakı debütünü Çempionlar Liqasında reallaşdıracaq. Siyahıda digər gənc qapıçılar isə Jannis Bartl və uzun müddət zədədən əziyyət çəkən Leon Klanacdır.

“Bayern Münhen” ilk oyunda “Atalanta”ya qarşı 6:1 hesabı ilə qələbə qazanaraq 1/4 final üçün böyük üstünlük əldə edib. Preskottun çıxışı həm komanda, həm də öz karyerası üçün tarixi bir an olacaq.