PSJ-nin braziliyalı futbolçusu Lukas Beraldo komandadan ayrılmaq niyyətindədir.
90plus.az xəbər verir ki, 21 yaşlı müdafiəçi bu mövsüm kifayət qədər oyun şansı əldə etmədiyi üçün narazılığını bildirib. Bu barədə məlumatı Fransanın “L'Équipe” nəşri yayıb.
Məlumata görə, Beraldo yanvar ayında klub rəhbərliyinə ayrılmaq istədiyini çatdırıb. O, 2026-cı il dünya çempionatı öncəsi daha çox oynamaq və optimal formada qalmaq məqsədilə başqa kluba icarəyə verilməsini istəyir. Baş məşqçi Luis Enrike də futbolçunun bu istəyinə qarşı çıxmayıb.
Qeyd: PSJ Lukas Beraldonu 2024-cü ilin yanvarında Braziliyanın “San Paulo” klubundan 20 milyon avroya transfer edib. Gənc mərkəz müdafiəçisi bu mövsüm Paris təmsilçisinin heyətində 11 rəsmi oyunda meydana çıxaraq 1 qol ötürməsi ilə yadda qalıb. Onun Fransa klubu ilə müqaviləsi 2028-ci ilin yayına qədər qüvvədədir.
