62 yaşlı Hollivud ulduzu Bred Pitt “İnter Mayami”nin 38 yaşlı hücumçusu Lionel Messiyə heyranlığını gizlətməyib. “Döyüş Klubu” və “Troya” kimi filmlərlə tanınan Pitt 2022-ci ildə Qətərdə keçirilən dünya çempionatında Argentina yığmasını zirvəyə daşıyan Messinin çıxışından “tamamilə valeh olduğunu” bildirib.
90plus.az xəbər verir ki, dünyaca məşhur futbol saytı “Goal.com”un məlumatına görə, Pitt bu fikirləri son günlərdə Britaniya mediası olan “LADbible”ın “Razılaş və ya Etiraz et” rubrikasında aktyor Damson İdrislə söhbət zamanı səsləndirib. Onlar birlikdə Pittin son layihəsi olan “Formula 1: Film”də çəkiliblər və bu verilişdə dünyanın ən yaxşı idmançıları haqqında müzakirə aparıblar. İdris Messini tərifləyərək deyib: “O, yadplanetlidir. Həqiqətən inanılmaz oyunçudur.” Pitt isə bu fikrə tam razılaşdığını bildirib.
Pitt əlavə edib:
“O, doğrudan da möhtəşəmdir. Mən Messini sevirəm. Onun bu qədər il dünya səviyyəsində mübarizə apardığını bilə-bilə, nəhayət bu uğuru əldə etməsi məni heyran qoydu. Bu, son şans idi və o, buna nail oldu.”
2021 və 2022-ci illərdə ardıcıl qazanılan iki Amerika Kuboku və 2022 Dünya Çempionatı ilə birlikdə Argentina 3 il ərzində 4 beynəlxalq turnir kubokunu qazanıb və bütün bu uğurların mərkəzində Messi olub. Pitt bu barədə belə deyib:
“Bu, tamaşaçı kimi izləyəndə insanı içindən çəkib aparan bir hekayədir.”
Hazırda isə Messi 2025-ci ildə keçiriləcək Klubların Dünya Çempionatında “İnter Mayami” ilə iştirak etməyə hazırlaşır. Onların ilk rəqibi isə Messinin bir vaxtlar formasını geyindiyi Avropa çempionu PSJ olacaq. Qətərdə dünyanı valeh edən Messinin yenidən qlobal səviyyədə parlayıb-parlamayacağı böyük maraq doğurur.
