“Çelsi”nin baş məşqçisi Liam Rosenyor Çempionlar Liqasının 1/8 final mərhələsində komandasının PSJ ilə qarşılaşacağını öyrəndikdən sonra həyəcanını gizlətməyib.

90plus.az xəbər verir ki, jurnalistlərə açıqlama verən Rosenyor Paris təmsilçisinin keyfiyyətini yüksək qiymətləndirib və “Strasbur”la birlikdə Fransa nəhənginə qarşı əvvəlki təcrübəsini xatırladıb:

“Çox həyəcanlıyam. PSJ fantastik komandadır. Aydındır ki, Fransada onlara qarşı oynamaq təcrübəm var. Həmişə heyranlıqla yanaşdığım komandadır. Düşünürəm ki, Luis Enrike orada inanılmaz iş görüb.

Bunlar insanın yaşamaq istədiyi oyunlardır. Futbola məhz belə matçlar üçün gəlirsən. İki möhtəşəm komanda arasında əla qarşılaşma olacaq.

Bunu səbirsizliklə gözləyirəm. Amma ondan əvvəl diqqət yetirməli olduğum daha üç oyunumuz var,” – deyə Liam bildirib.