Çempionlar Liqasında ilk vəsiqələr sahiblərini tapdı – “Qarabağ” sabah meydandadır.
90plus.az xəbər verir ki, UEFA Çempionlar Liqasının pley-off mərhələsinin cavab oyunları start götürüb. Artıq liqa mərhələsinə yüksələn ilk üç komanda müəyyənləşib.
Qazaxıstan təmsilçisi “Kayrat” evdə Şotlandiyanın “Seltik” klubunu qəbul edib. Qarşılaşmanın əsas və əlavə vaxtı qolsuz bərabərliklə başa çatıb. Penalti seriyasında 3:2 hesabı ilə üstün olan “Kayrat” növbəti mərhələyə adlayıb.
Kipr klubu “Pafos” isə doğma meydanda Serbiyanın “Srvena Zvezda”sı ilə qarşılaşıb. Matç 1:1 hesabı ilə başa çatıb. İlk oyunda 2:1 hesablı qələbə qazanan “Pafos” ümumi nəticəyə görə mərhələ keçib.
Avstriyada keçirilən digər oyunda isə “Şturm” 2:1 hesabı ilə Norveçin “Budyo Qlimt” klubunu məğlub edib. Səfərdəki ilk matçda 0:5 hesablı darmadağın yaşayan Avstriya təmsilçisi ümumi nəticədə mərhələni keçə bilməyib. Beləliklə, “Budyo Qlimt” liqa mərhələsinə vəsiqə qazanan üçüncü komanda olub.
Sabah keçiriləcək oyunlarda isə daha 4 vəsiqənin taleyinə aydınlıq gələcək.
Azərbaycan çempionu “Qarabağ” Tofiq Bəhramov adına Respublika Stadionunda Macarıstan “Ferensvaroş”u ilə cavab matçına çıxacaq. Ağdam klubu ilk görüşdə səfərdə 3:1 hesabı ilə qalib gəlib və mərhələ üçün ciddi üstünlüyə malikdir.
Günün digər qarşılaşmaları:
- “Kopenhagen” – “Bazel” (ilk oyun: 1:1)
- “Benfika” – “Fənərbağça” (ilk oyun: 0:0)
- “Brügge” – “Reyncers” (ilk oyun: 3:1)
Bütün görüşlər Bakı vaxtı ilə saat 23:00-da başlayacaq.
