Misli Premyer Liqasının 10-cu turunda “Qəbələ” üzərində səfər qələbəsi qazanan “Sabah”ın baş məşqçisi Valdas Dambrauskas matçdan sonra fikirlərini bölüşüb.
90plus.az xəbər verir ki, litvalı mütəxəssis 1-0-lıq nəticənin çətin əldə olunduğunu vurğulayıb:
“Qələbə münasibətilə azarkeşlərimizi və rəhbərliyimizi təbrik edirəm. Çox çətin oyun oldu. Sürətli futbolçulara sahib komanda ilə oynamaq bizim üçün çətin idi. İlk hissədə çox təhlükəli vəziyyətlər yaratdılar. Biz çalışırdıq ki, rəqibi qapımızdan uzaq saxlayaq. Çox şadam ki, qapımızı toxunulmaz saxladıq və 3 xal qazandıq. İrəlidə daha da yaxşı olacağımıza inanıram.”
“İsayevin dönüşü sevindirir”
Dambrauskas uzun fasilədən sonra sıraya qayıdan Aleksey İsayev barədə də fikirlərini bildirib:
“Alekseyin yenidən bizimlə olması məni sevindirir. Zədədən qayıtmaq onun üçün asan olmadı. İstəyirik ki, o, matçlarda ara ötürmələr versin və əvvəlki formasına dönsün. Hələ tam istədiyimiz səviyyədə olmasa da, məşqlərdə həvəsli olması və tapşırıqları yerinə yetirməsi bizi gələcək üçün ümidləndirir.”
“Sabah” bu qələbə ilə xalını 18-ə artıraraq turnir cədvəlində 4-cülüyə yükskib. Dambrauskas komandasının daha yaxşı olacağına inanır.
