FİFA “Futbol dünyanı birləşdirir” adlı yeni sülh mükafatını təsis edib. Bu mükafat “sülh naminə görülmüş qeyri-adi fəaliyyətlərə” görə veriləcək və ilk dəfə 2026-cı il dünya çempionatının püşkatma mərasimində — 5 dekabrda Vaşinqtonda təqdim olunacaq.
90plus.az xəbər verir ki, FİFA prezidenti Canni İnfantino tərəfindən dünya futbol ictimaiyyəti adından təqdim ediləcək illik mükafat həmrəyliyi təşviq edən şəxsləri önə çıxarmağı hədəfləyir.
“Futbol sülh deməkdir”, – deyə İnfantino bildirib və onun beş milyarddan çox azarkeş üçün ümid və barışıq mesajı daşıdığını vurğulayıb.
Bu təşəbbüsün vaxtı diqqət çəkib, çünki cəmi bir neçə həftə əvvəl ABŞ prezidenti Donald Tramp respublikaçılar və bir sıra dünya liderlərinin fəal dəstəyinə baxmayaraq Nobel Sülh Mükafatını ala bilməmişdi. Nobel qərarını açıq şəkildə tənqid edən Tramp İnfantino ilə sıx münasibətlərə malikdir – onlar oktyabrda Misirdə keçirilən sülh sammitində birgə şəkil çəkdiriblər və çərşənbə günü Mayamidə biznes forumunda çıxış ediblər.
FİFA-nın son qərarlarından biri — İvanka Trampın dünya çempionatının 100 milyon dollarlıq təhsil proqramı şurasına təyin olunması — bu əlaqələrin daha da dərinləşdiyini göstərir.
Tənqidçilər yeni mükafatı FİFA-nın geosiyasi imic cəhdi kimi görür və onu Nobel Sülh Mükafatı ilə müqayisə edirlər. Lakin İnfantino iddia edir ki, bu təşəbbüs siyasətdən uzaqdır və yalnız futbolun birləşdirici gücünü nümayiş etdirmək məqsədi daşıyır.
İlk laureatın kim olacağı hələ açıqlanmayıb, lakin Vaşinqtondakı Kennedi Mərkəzində keçiriləcək təqdimat mərasimi – futbol və diplomatiyanın bir araya gələcəyi bir hadisə kimi – böyük maraq doğuracaq.
