FIFA-nın İnkişaf Direktoru və fransız mütəxəssis Arsene Venger tərəfindən bir müddət əvvəl təklif olunan yeni ofsayd qaydası rəsmi şəkildə təsdiqlənib.
90plus.az xəbər verir ki, 2018-ci ilin iyununda “Arsenal” klubundan ayrıldıqdan sonra FIFA-da vəzifəyə başlayan təcrübəli məşqçinin təşəbbüsü futbol dünyasında ciddi dəyişiklik vəd edir.
Yeni ofsayd sistemi necə olacaq?
Yeni qaydaya əsasən, futbolçu yalnız son müdafiəçini tam şəkildə keçdiyi halda ofsayd sayılacaq. Artıq əvvəlki kimi bədənin hər hansı bir hissəsinin öndə olub-olmamasına görə qərar verilməyəcək.
Yəni oyunçunun ofsaydda hesab olunması üçün onun bədəninin bütövlükdə rəqib futbolçudan irəlidə olması tələb olunacaq. Bu dəyişiklik xüsusilə millimetr fərqlərlə verilən mübahisəli qərarların qarşısını almağa yönəlib.
İlk sınaq harada keçiriləcək?
The Times nəşrinin yaydığı məlumata görə, yeni qayda ilk olaraq Kanada Premyer Liqası çərçivəsində test ediləcək.
Sınaq mərhələsi uğurlu olacağı təqdirdə, yeni ofsayd qaydası 2027/28 mövsümündən etibarən mərhələli şəkildə bütün dünyada tətbiq olunmağa başlanacaq.
Beləliklə, futbol tarixində uzun illər tətbiq edilən ənənəvi ofsayd sistemi dəyişir və oyun qaydalarında yeni bir mərhələ başlayır.
