“Fənərbağça” Avroliqa çempionluğunu azarkeşləri ilə birlikdə qeyd etdi.
90plus.az xəbər verir ki, "Turkish Airlines EuroLeague" finalında “AS Monako”nu məğlub edərək tarixində ikinci dəfə kuboku muzeyinə aparan “Fənərbağça” basketbol komandası çempionluq sevincini azarkeşləri ilə birlikdə qeyd etdi.
Qeyd etmələrin mərkəzi isə İstanbulun məşhur Bağdat prospekti oldu. Prospekt karnaval əhval-ruhiyyəsinə büründü. “Ülker İdman və Tədbirlər Zalı”ndan yola düşən açıq avtobus zinciri Bağdat prospektinə çatanda sarı-lacivərtli azarkeşlər böyük coşqu ilə komandanı qarşıladı.
Azarkeşlər baş məşqçi Şarunas Yasikeviçyus və oyunçulara sevgi nümayiş etdirərək, marşlar və şüarlar səsləndirdi. Yasikeviçyus və komanda üzvləri də bu sevincə qoşularaq bayram abu-havasını bölüşdülər. Litvalı çalışdırıcı tribunadakı azarkeşlərlə birlikdə məşəl yandıraraq Avroliqa zəfərini qeyd etdi.
Çempionluq gecəsinin ən yadda qalan anlarından biri isə finalın MVP-si seçilən Naycel Heyz-Deyvisin çıxışı oldu. Ulduz basketbolçunun səhnədəki emosional və motivasiya dolu sözləri izdihamın alqışları ilə qarşılandı.
