İspaniya millisinin baş məşqçisi Luis de la Fuente Klubların Dünya Çempionatında parlayan “Real Madrid”in gənc futbolçusu Qonsalo Qarsiyanın milli komandaya çağırılması ilə bağlı söz-söhbətləri təkzib edib.

90plus.az xəbər verir ki, De la Fuente belə deyib:

“Qonsalo Qarsiya milliyə? Mənim kəndimdə belə deyirlər: onun hələ çox ‘hərbi xidməti’ qalıb.”

“Ümid edirəm ki, çoxlu Qonsalolar, çoxlu Kubarsilər, çoxlu Xeysenlər olar — elə oyunçular ki, U-21-dən keçmədən birbaşa əsas milliyə yüksəlsinlər. Amma onun hələ öyrənəsi çox şey var.”

“Sadəcə bir-iki yaxşı oyunla aldanmaq olmaz. O, La Liqada hələ çox az oyun keçirib.”

21 yaşlı Qonsalo Qarsiya bu yay Klubların Dünya Çempionatında 5 oyunda 4 qol vuraraq diqqət çəkib.

2024-cü ildə İspaniya ilə Avropa çempionu olan baş məşqçi əlavə edib:

“Ümid edirəm ki, o, bu cür çalışmağa davam edəcək.

Bu möhtəşəm milli komandada yer qazanmaq üçün o şansı qazanmaq və haqq etmək lazımdır. Orada karyerası çox güclü, yüksək səviyyəli oyunçular var. Buna layiq olmaq lazımdır, amma əlbəttə ki, ona dəstək verirəm.”