Misli Premyer Liqasının 15-ci turunda bu gün keçirilən “Karvan-Yevlax” – “İmişli” qarşılaşması 1:1 hesablı heç-heçə ilə yekunlaşıb. Matçdan sonra hər iki komandanın baş məşqçisi oyunu mətbuat konfransında dəyərləndirib.
90plus.az xəbər verir ki, “Karvan-Yevlax”ın baş məşqçisi Füzuli Məmmədov meydançanın durumu və hava şəraitinin oyuna ciddi təsir etdiyini bildirib:
Füzuli Məmmədov: “Ədalətli nəticə bərabərlik idi”
“Meydançanın durumu və hava şəraiti futbolçular üçün çox çətin idi. Ağır oyun oldu. Bura qələbə üçün gəlmişdik. Qalib gələ də, uduza da bilərdik. Matçın ədalətli nəticəsi bərabərlik idi”.
Təcrübəli mütəxəssis futbolçularının xarakterindən razı qaldığını da vurğulayıb:
“Hesabda geri olsaq da, əzmkarlıq göstərib bərabərlik qolunu vurdular. Çətin şəraitə baxmayaraq döyüşkənlik nümayiş etdirdilər. Qarşıdakı oyunlara hazırlaşacağıq”.
Jorj Kaşkilya: “Qələbəyə daha çox layiq idik”
“İmişli”nin baş məşqçisi Jorj Kaşkilya isə nəticədən tam razı qalmadığını, lakin komandasının oyunundan məmnun olduğunu deyib:
“Nəticə istədiyimiz kimi olmadı. Çünki qələbəyə daha çox layiq idik. 90 dəqiqə ərzində daha istəkli, mübarizə aparan tərəf biz idik”.
O, hava şəraitinin texnikalı komandalar üçün çətinlik yaratdığını da əlavə edib:
“Birinci hissədə 4-5 təhlükəli epizod yaratdıq, amma yalnız bir qol vura bildik. İlk hissədə oyunu bitirmək olardı. Meydançanın vəziyyəti ikinci yarıda daha da pisləşdi. Buna baxmayaraq futbolçularım maksimumunu ortaya qoydu. 3 xal istəyirdik, amma 1 xal da pis deyil”.
