A Seriyasında mərc qalmaqalı genişlənməkdə davam edir. 90plus.az "La Republica" nəşrinə istinadən xəbər verir ki, İtaliya çempionatının 10-dan çox futbolçusu istintaqa cəlb edilib. Daha əvvəl yayılan xəbərə görə, “Yuventus”un yarımmüdafiəçisi Nikolo Fadjoli qanunsuz mərclər etdiyini etiraf edib. Vəkilləri futbolçunun cəzasını yüngülləşdirmək üçün onun heç vaxt çıxış etdiyi komandaların matçlarına pul qoyuluşi etmədiyini iddia ediblər. Onlar deyiblər ki, Fadjolinin mərc aludəçiliyi var. O, bu səbəbdən gənc yaşlarından aktiv şəkildə poker oynamağa başlayıb. Bildirilir ki, istintaq Fadjolinin qeyri-qanuni mərc oyunlarında iştirakını təsdiqləsə, o, üç il və ya daha çox müddətə diskvalifikasiya ediləcək. Buna 25 min avrodan başlayaraq cərimə də əlavə oluna bilər. Daha bir məlumata görə, İtaliya millisinin üzvləri  Sandro Tonali ("Nyukasl) və Nikolo Zanioloya ("Aston Villa") qarşı da qanunsuz mərc oyunları ilə bağlı ittiham irəli sürülə bilər. Jurnalist Fabrizio Koronada onda bu futbolçuların həqiqətən mərc oynadıqlarını sübut edən məlumatlar olduğunu bildirib. Artıq hər iki oyunçunun hüquq-mühafizə orqanları ilə əməkdaşlığa başladığı bildirilib.