“Aston Villa” Temmi Abrahamı yenidən heyətinə qatmaq istəyir.
90plus.az xəbər verir ki, “Aston Villa” hücumçu Temmi Abrahamın yenidən kluba qaytarılması variantını nəzərdən keçirir.
“Çelsi” akademiyasının yetirməsi olan Abraham 2018–2019 mövsümündə icarə əsasında “Aston Villa”da çıxış edib. O, həmin mövsüm 40 oyunda 26 qol vuraraq komandanın Premyer Liqaya yüksəlməsində mühüm rol oynayıb.
Hazırda 28 yaşlı futbolçu Türkiyə təmsilçisi “Beşiktaş”da “Roma”dan icarə əsasında çıxış edir. Abraham burada uğurlu forma sərgiləyir – 24 oyunda 12 qol vurub.
“Aston Villa” rəhbərliyi təcrübəli hücumçunu Premyer Liqada ilk dördlük uğrunda mübarizədə Olli Uotkinsə rəqabət yaradacaq futbolçu kimi dəyərləndirir.
Lakin transferin reallaşmasına bir neçə maneə var. Abrahamın hazırda icarədə olması və həftəlik 115 min funt sterlinq maaşı əsas çətinliklər sırasındadır. Bundan başqa, “Beşiktaş”ın mövsümün sonunda futbolçunu 11,2 milyon funt qarşılığında almaq şərti öhdəliyi mövcuddur.
