"Preston" futbolçusuna irqçilik səbəbindən 9 oyunluq cəza verildi.
90plus.az xəbər verir ki, İngiltərə Futbol Federasiyası "Preston" klubunun futbolçusu Milutin Osmajicə, "Börnli" oyunçusu Hannibal Mejbriyə qarşı irqçi ifadə işlətdiyi üçün 9 oyunluq diskvalifikasiya və 21 min funt sterlinq cərimə cəzası verib.
Hadisə ötən mövsüm Çempionşip çərçivəsində keçirilən "Preston" – "Börnli" qarşılaşmasında baş vermişdi. Məsələyə dair araşdırma və dinləmələr uzun müddət davam etdikdən sonra qərar bu həftə açıqlanıb.
Federasiyanın rəsmi açıqlamasında bildirilir ki, oyun zamanı “rəng və ya irqə istinad edən ifadə və ya təhqir” işlədilməsi “ağırlaşdırılmış pozuntu” kimi qiymətləndirilib və buna görə də sərt cəza tətbiq olunub.
"Preston" klubundan yayılan açıqlamada isə qərarın hüquqi tərəfinə diqqət çəkilib:
“Nəticənin ‘Məntiqi Şübhədən Kənar’ deyil, ‘Ehtimallar Tarazlığı’ prinsipi əsasında verildiyini görürük. Milutin hər zaman özünü günahsız hesab edib və bu mövqeyini qoruyur. Biz oyunçumuza tam dəstəyimizi davam etdiririk.”
Beləliklə, Milutin Osmajic 9 qarşılaşmada meydana çıxa bilməyəcək və əlavə olaraq 21 min funt sterlinq məbləğində cərimə ödəyəcək.
