İtaliya millisinin və “Napoli”nin sabiq hücumçusu Lorenzo İnsinye karyerasını yenidən “Peskara Kalço”da davam etdirə bilər.

90plus.az xəbər verir ki, hazırda azad agent statusunda olan 34 yaşlı futbolçunun yaxın zamanda “Peskara Kalço”ya keçidi gündəmdədir. Bu transfer İnsinye üçün simvolik məna daşıyır, çünki o, 2011/12 mövsümündə məhz bu klubda çıxış edərək İtaliya futbolunda ad qazanmağa başlamışdı.

İnsinye ötən yay “Toronto” klubu ilə müqaviləsi başa çatdıqdan sonra komandadan ayrılıb. O vaxtdan bəri təcrübəli hücumçu karyerasının növbəti addımı ilə bağlı variantları dəyərləndirirdi və “Peskara Kalço” əsas namizəd kimi ön plana çıxıb.

Gözlənilən razılaşmaya əsasən, İnsinye mövsümün sonuna qədər “Peskara Kalço”da çıxış edəcək və müqavilədə uzadılma opsiyası da yer alacaq. Bu transfer onun Serie B-də mübarizə aparan gənc komandaya həm təcrübə, həm də liderlik qatmasına imkan verə bilər.