"Borussiya Dortmund"un baş məşqçisi Niko Kovaç hücumçu Seru Girassinin əl sıxmaqdan imtinasına münasibət bildirdi: “Öz təşəbbüsü ilə gəlib üzr istədi”.
90plus.az xəbər verir ki, "Borussiya Dortmund"un şənbə günü "Leverkuzen"ə qarşı səfərdə qazandığı 2:1 hesablı qələbə zamanı diqqətçəkən an yaşanıb. 61-ci dəqiqədə əvəzlənən Seru Girassi baş məşqçi Niko Kovaçın əlini sıxmaqdan imtina edib və bu görüntü Almaniyada böyük müzakirələrə səbəb olub.
Bugünkü mətbuat konfransında (2 dekabr, kubok oyunu ərəfəsində) Niko Kovaç həmin epizod barədə danışıb və bildirib ki, Girassi artıq davranışına görə üzr istəyib.
Kovaçın sözlərinə görə: “Serunun ilk dəfə belə reaksiyası oldu. Matçdan dərhal sonra bunu böyüklər kimi aramızda müzakirə etdik. Öz təşəbbüsü ilə yanıma gəldi və üzr istədi.”
Çalışdırıcı davam edib: “Hamımız səhv edə bilərik. Emosiyanın, adrenalinin yüksək olduğu anlarda belə hallar baş verə bilər. Olmamalıdır, amma baş verə bilər. Komanda da bunu düzgün qarşıladı. Sevindirici haldır ki, bu, təkrarlanacaq bir şey deyil.”
Hadisənin arxa fonu: Bundesliqanın 12-ci turunda Leverkuzen – Borussiya Dortmund qarşılaşması 1:2 hesabı ilə “sarı-qaralar”ın xeyrinə başa çatıb. Lakin matçın ən çox müzakirə olunan tərəfi nəticə yox, Girassinin davranışı olub.
Son vaxtlar transfer xəbərlərinin mərkəzində olan komandanın lideri Girassi artıq ikinci dəfə oyunu narazı şəkildə tərk edir.
Xatırlatma: Çempionlar Liqasının “Vilyarreal” ilə matçında da əvəzləndikdən sonra skamyaya əsəbi şəkildə yönəlmişdi.
Bu dəfə isə narazılıq daha açıq formada – Niko Kovaçla və digər məşqçilərlə əl sıxmaqdan imtina etməklə göstərildi. Komanda yoldaşları ilə də eyni davranışı nümayiş etdirdi.
