“La Liqa” oyunlarında Fələstin bayraqlarına qadağa yoxdur.

90plus.az xəbər verir ki, “La Liqa” prezidenti Xavyer Tebas bu həftə böyük müzakirələrə səbəb olan məsələ ilə bağlı mövqeyini açıqlayıb. O, stadionlarda Fələstin bayraqlarına qadağa qoyulmadığını təsdiqləyib.

Tebas şənbə günü verdiyi açıqlamada bildirib:
“Əgər hansısa hərəkət qayda daxilindəsə və heç nəyə mane olmursa, ona hörmətlə yanaşmaq lazımdır”.
O, bununla yanaşı, yarışlara mane olan etirazların isə fərqli qiymətləndirildiyini vurğulayıb.

Bu açıqlama “Santyaqo Bernabeu” stadionunda azarkeşlərin Fələstin bayraqları ilə içəri buraxılmaması barədə sosial şəbəkələrdə yayılan məlumatlardan sonra verilib. Məsələ xüsusilə Qəzza bölgəsindəki gərgin vəziyyət fonunda geniş rezonans doğurub.

“La Liqa” rəhbəri Qəzzadakı humanitar böhranın “çətin və izlənilməsi ağır” olduğunu qəbul edib, lakin idmanın davam etməli olduğunu bildirib:
“Elə heç bir hərəkət olmamalıdır ki, yarışların iflic olmasına səbəb olsun”.

Avropa turnirlərində İsrail klubları ilə mümkün qarşılaşmalara da toxunan Tebas, belə qərarların mürəkkəb olduğunu qeyd edib və əlavə edib:
“Ümid edirəm ki, vəziyyət heç olmasa tam həll olunmasa da, əhali əziyyət çəkməyəcək səviyyəyə çatacaq”.