Trent Aleksander-Arnoldun “Real Madrid”ə transferindən sonra “Liverpul”un müdafiə xətti növbəti sarsıntı ilə üz-üzə qala bilər.
90plus.az xəbər verir ki, klub daxilindən sızan məlumatlara görə, “Liverpul” rəhbərliyi İbrahima Konatenin gələcəyi ilə bağlı narahatlıq keçirir.
Fransalı müdafiəçi ilə müqavilə 2026-cı ilə qədər qüvvədə olsa da, Konatenin yeni müqavilə danışıqlarına başlamağa maraq göstərməməsi klub daxilində “narahatedici bir atmosfer” yaradıb. Mənbələrin bildirdiyinə görə, komanda daxilində “Trent vəziyyətinin təkrarlanması” qorxusu güclənir.
“Real Madrid”in Konate ilə yaxından maraqlandığı və onu uzunmüddətli müdafiə planına daxil etdiyi deyilir. Klub artıq “Enfild”dən bir ulduz futbolçunu heyətinə qatmağa nail olub və görünür ki, daha birini transfer etmək niyyətindədir.
Konate ilə yeni müqavilə ilə bağlı danışıqlar hazırda dayanmış vəziyyətdədir və bu, “Liverpul” üçün yaxın gələcəkdə ciddi problemə çevrilə bilər.
