“Mançester Yunayted”in FA Kubokundakı mübarizəsi çox qısa çəkib. “Qırmızı şeytanlar” turnirin 3-cü turunda “Brayton Houv Albion”a məğlub olaraq kubokla vidalaşıblar.
90plus.az xəbər verir ki, bundan əvvəl “Mançester Yunayted” Liqa Kubokunda (Karabao Kuboku) da fiasko yaşamışdı. Komanda 2-ci liqa təmsilçisi “Qrimsbi Taun”a uduzaraq turnirdən kənarlaşdırılmışdı. Avrokuboklarda da iştirak etməyən İngiltərə nəhəngi üçün 2025/26 mövsümü erkən məyusluqlarla yadda qalıb.
Bu nəticələrdən sonra “Mançester Yunayted”in cari mövsümdə maksimum 40 oyun keçirəcəyi rəsmi olaraq dəqiqləşib. Bu isə klub tarixində nadir hallarda rast gəlinən göstəricidir.
The Athletic nəşrinin jurnalisti Uill Ceynsin məlumatına görə, bu rəqəm “Mançester Yunayted”in 1914/15 mövsümündən bəri (müharibə illəri istisna olmaqla) bir mövsümdə keçirdiyi ən az oyun sayı olacaq.
Bu statistika klubun son illərdə yaşadığı idman böhranını bir daha göz önünə sərir və azarkeşlər arasında ciddi narahatlıq yaradıb.
