Bruno Fernandeşi “Mançester Yunayted”də saxlayan sual — həyat yoldaşının bir cümləsi 100 milyon funtluq təklifi rədd etdirdi.

90plus.az xəbər verir ki, "Mançester Yunayted"in kapitanı Bruno Fernandes Səudiyyə Ərəbistanından aldığı cəlbedici təklifi rədd edərək karyerasını İngiltərədə davam etdirməyə qərar verib.

31 yaşlı portuqaliyalı yarımmüdafiəçi bildirib ki, yay aylarında "Əl-Hilal" onun üçün 100 milyon funt sterlinq dəyərində təklif irəli sürüb. Lakin həyat yoldaşı Ana Pinyonun bir sualı onun qərarını tamamilə dəyişib:

“Klubda istədiyin hər şeyi əldə etmisənmi?”

Bu sual Bruno Fernandeşi dərin düşünməyə vadar edib və o, "Mançester Yunayted"də hədəflərinə çatmadan ayrılmaq istəmədiyini anlayıb.

Futbolçu həmçinin qərar verməzdən əvvəl tanış simalarla da məsləhətləşib — "Əl-Nəsr"də çıxış edən həmvətəni Kriştianu Ronaldodan, eləcə də keçmiş "Sportinq" çalışdırıcısı, hazırda "Əl-Nəsr"i idarə edən Corce Jezusa fikir soruşub.

Fernandes yeni komanda yoldaşları Mateus Kunya və Brayan Mbeumonun komandaya qatdığı ruh və məsuliyyət hissini də yüksək qiymətləndirib. Onun sözlərinə görə, bu keyfiyyətlər "Mançester Yunayted"in yenidən yüksəlişi üçün vacibdir.

Portuqaliyalı ulduz 2020-ci ildə "Sportinq"dən "Mançester Yunayted"ə keçdikdən sonra klubun heyətində artıq 300-cü oyununa çıxıb, 100 qol vurub və 87 asist qeyd alıb.

Komandanın kapitanı kimi Fernandes artıq Liqa Kuboku və İngiltərə Kubokunu qazanıb, lakin onun əsas arzusu "Mançester Yunayted"i Premyer Liqa və Çempionlar Liqası qələbələrinə daşımaqdır.

Həyat yoldaşının dəstəyi, futbol əfsanələrinin məsləhətləri və yeni oyunçuların enerjisi ilə Bruno Fernandes "Mançester Yunayted"i yenidən zirvəyə aparmağa qərarlıdır.