İtaliyalı təcrübəli mütəxəssis Mauritsio Sarri karyerasında yeni səhifə açmaq əvəzinə, tanış ünvana geri dönməyi seçdi. "Latsio" klubu rəsmi olaraq 66 yaşlı baş məşqçinin komandaya yenidən təyin edildiyini açıqlayıb.
90plus.az xəbər verir ki, qısa müddət əvvəl baş məşqçi Marko Baroni ilə yollarını ayıran "Latsio" rəhbərliyi Sarri ilə anlaşaraq, təcrübəli çalışdırıcını yenidən klubun sükanı arxasına gətirdi.
Karyerası uğurlarla doludur
Bank sahəsində çalışdıqdan sonra məşqçilik karyerasına başlayan Sarri 2005-ci ildə "Peskara" ilə peşəkar səviyyəyə qədəm qoydu. Daha sonra "Empoli" ilə A Seriyaya yüksəlmə uğuru qazandı və ardınca "Napoli", "Çelsi" və "Yuventus" kimi nəhəng klublarda çalışdı. O, 2019-cu ildə "Çelsi" ilə UEFA Avropa Liqasının qalibi olub, "Yuventus" ilə isə A Seriya çempionluğu sevinci yaşayıb.
"Latsio"ya dönüş
Sarri daha əvvəl 2021–2024-cü illər arasında "Latsio"nun baş məşqçisi olub. Onun rəhbərliyi altında komanda 2022/23 mövsümündə A Seriyanı ikinci pillədə tamamlayıb. Lakin növbəti mövsümdəki zəif nəticələr və transfer siyasəti ilə bağlı fikir ayrılıqları səbəbilə 2024-cü ilin martında postundan ayrılmışdı.
İndi isə təcrübəli çalışdırıcı yenidən "Latsio"ya qayıdaraq, klubu uğura daşımaq üçün iş başına keçib.
