Argentina millisinin kapitanı Lionel Messi “Finalissima”nın ləğv olunmasından məyusluğunu ifadə edib - ESPN
90plus.az xəbər verir ki, o, bu oyunu Dünya Çempionatı öncəsi vacib rəqabətli sınaq kimi görürdü. Hazırda “İnter Mayami” klubunun kapitanı olan Messi yaxın vaxtlarda komandası ilə MLS Kubokunu qazanıb. Mənbənin bildirdiyinə görə, qarşılaşmanın ləğvi ilə bağlı aparılan müzakirələrdə futbolçu iştirak etməyib. Messi oyuna böyük ambisiya ilə yanaşır və karyerasına daha bir titul əlavə etmək istəyirdi.
2024-cü il Amerika Kubokunun qalibi Argentina ilə AVRO-2024 çempionu İspaniya arasında keçirilməli olan görüş martın 27-də Qətərdə planlaşdırılmışdı. Lakin Yaxın Şərqdə davam edən münaqişə səbəbindən matç ləğv olunub.
UEFA açıqlamasında bildirib:
“UEFA və Qətərdəki təşkilatçı qurumlar arasında aparılan uzun müzakirələrdən sonra bu gün elan olunur ki, regiondakı mövcud siyasi vəziyyətə görə Finalissima planlaşdırıldığı kimi Qətərdə keçirilə bilməz.”
Qurum əlavə edib ki, alternativ məkan və tarixlər də nəzərdən keçirilib, lakin sonda bu variantlar Argentina Futbol Assosiasiyası üçün qəbuledilməz olub.
CONMEBOL isə bildirib ki, Argentina Avropada neytral meydanda oynamağa razı idi və matçın martın 31-də keçirilməsini təklif etmişdi. Lakin UEFA həmin tarixin uyğun olmadığını açıqlayıb və nəticədə oyun tamamilə ləğv olunub.
Futbol tarixinin ən çox titul qazanan oyunçusu hesab edilən Messi indi növbəti böyük yarış — qarşıdan gələn Dünya Çempionatında karyerasına yeni uğur əlavə etmək şansını gözləyir.
