Bakıda bir usta məişət texnikasını aşağı qiymətlərlə satacağına dair vədlərlə üç nəfəri aldadaraq on min manat pul alıb.

90plus.az xəbər verir ki, 41 yaşlı Aslan Məmmədov zərərçəkmiş şəxslərə ucuz məişət avadanlığı verəcəyini bildirsə də, pulu əldə etdikdən sonra sözünə əməl etməyib. Aldadılan şəxslər hüquq-mühafizə orqanlarına şikayət etdikdən sonra o, saxlanılıb.

Aslan Məmmədov məhkəmədə ifadəsində bildirib ki, qumar oyunlarına olan aludəçiliyi onu bu hərəkətə vadar edib:

“Qumar vərdişim yaranandan sonra bu hadisələr baş verdi. Bütün pulumu “Beşiktaş”ın oyunlarında itirdim. Hər həftə bu klubun oyunlarına mərc edirdim, amma heç vaxt qazanc əldə edə bilmədim. Etdiklərimə görə peşmanam. Artıq zərərçəkənlərlə barışmışam, nəzərə alınmasını istəyirəm”.

Məhkəmə araşdırması zamanı onun ailə üzvləri zərərçəkənlərin maddi zərərini və dövlət rüsumunu tam şəkildə ödəyiblər.

Məhkəmənin qərarına əsasən, Aslan Məmmədova qarşı irəli sürülmüş cinayət işi dayandırılıb və o, məhkəmə zalından azadlığa buraxılıb.