Valid Reqraqi Mərakeş millisindən istefa verib.

90plus.az xəbər verir ki,  Valid Reqraqi Afrika Millətlər Kubokunun finalında məğlubiyyətdən sonra Mərakeş milli komandasının baş məşqçi postundan istefa vermək qərarına gəlib.

Final görüşündə Mərakeş yığması əlavə vaxtda Seneqal millisinə 0:1 hesabı ilə uduzub. Qarşılaşmanın əsas vaxtı isə qolsuz bərabərliklə (0:0) yekunlaşıb.

Bildirilir ki, Reqraqi öz gələcəyini Afrika Millətlər Kubokundakı nəticədən asılı hesab edirdi. Mütəxəssis artıq istefa ərizəsini Mərakeş Futbol Federasiyasına (FRMF) təqdim edib. O, dünya çempionatına altı aydan az vaxt qalmasına baxmayaraq, işini davam etdirmək niyyətində deyil.

Hazırda FRMF məsələ ilə bağlı rəsmi qərar verməyib. Əgər istefa qəbul olunsa, federasiya qısa müddətdə yeni baş məşqçi tapmalı olacaq. Yekun qərarın yaxın zamanda açıqlanacağı gözlənilir.