“Milan”ın yeni transferi Luka Modriç klubun rəsmi kanalına təəssüratlarını bölüşüb. Milannews.it vasitəsilə təqdim edilən müsahibədə xorvatiyalı ulduz aşağıdakı fikirləri səsləndirib.

90plus.az xəbər verir ki, Modriç öncə uşaqlıqda “Milan” geyimində çəkilən şəkli haqqında bunları deyib:

“Bu çox gözəl bir fotodur. Uşaq vaxtı A Seriyasını çox izləyirdim və “Milan” mənim sevimli komandam idi. Həmin vaxt Xorvatiyada “Milan” oyunlarını çox göstərirdilər, çünki o, dünyanın ən çox izlənilən klublarından biri idi. İdolum olan Boban da orada oynayırdı. İndi isə burada olmaqdan çox xoşbəxtəm və bu yeni macəraya başlamağı səbirsizliklə gözləyirəm.”

Niyə “Milan”ı seçdi:

“Avropada qalaraq rəqabətli futbolda oynamağa davam etmək istəyirdim. Başqa təkliflərim də var idi, amma “Milan” mənimlə əlaqə saxlayan kimi hər şey aydın oldu. Mən bunu ilk andan istədim. İdman direktoru (İqli Tare) Xorvatiyaya gəlib layihəni şəxsən mənə təqdim etdi. Bu, mənim üçün çox önəmli idi – onların məni komandada görmək istədiyini hiss etdim. Üstəlik, “Milan” Avropanın ən böyük klublarından biridir. “Milan” orta nəticələrlə kifayətlənə bilməz – bu klub ən yüksək məqsədlərə can atmalıdır: titullar qazanmaq və dünyanın ən yaxşı komandaları ilə yarışmaq. Mən də məhz bunun üçün buradayam.”

Komandaya nə verə biləcəyi barədə:

“İlk növbədə, hər kəsə – oyunçulara, məşqçilərə və ümumiyyətlə kluba dərin hörmətlə yanaşıram. Qalib gəlmək istəyi ilə gəlirəm, komanda yoldaşlarıma hər cür kömək etmək, çalışmaq və komandada yer qazanmaq üçün əlimdən gələni edəcəyəm. Bu asan deyil – çox çalışmaq və mübarizə aparmaq lazımdır.”

A Seriyası barədə fikirləri:

“Italiya futbolunu çox izləmişəm – çox rəqabətli və son illərdə daha da inkişaf edən bir liqadır. Burada bir çox xorvat futbolçular çıxış edir və mən də həmişə həmvətənlərimi izləməyi sevirəm. Liqada güclü komandalar, yaxşı oyunçular var. Çox taktiki və fiziki bir mühitdir.”

Futbol karyerasını uzun müddət davam etdirməsinin sirri:

“Mən həmişə deyirəm: mənim üçün ən vacib şey sevgidir – oyuna və futbola olan sevgi. Bu hissi hələ də daşıyıram, içimdə hələ də o alov var. Məni irəli aparan da budur. Təbii ki, yaxşı çalışmaq, hazırlıqlı olmaq və sağlam həyat tərzi də önəmlidir. Böyük bir sirr yoxdur – əsas olan ehtiras və futbola olan sevgidir.”

14 nömrəni seçməsi barədə:

“Bu nömrəni sevirəm. Bilirəm ki, “Milan”da 10 nömrəni hazırda böyük bir futbolçu – Leao daşıyır. O, həm bu günün, həm də gələcəyin oyunçusudur. 10 nömrə boş olmadığından başqa birini seçməli oldum. Mən də 14-ü seçdim – çünki onu sevirəm. Karyeramın əvvəlində, millidə və “Tottenhem”də də bu nömrəni daşıyırdım. Ümid edirəm ki, bu dəfə də uğurlu olacaq.”

Hələ həyata keçirmək istədiyi arzular barədə:

“Artıq bir çox məqsədlərimə çatmışam – hətta düşündüyümdən də artığına. Bütün etdiklərim üçün çox xoşbəxt və minnətdaram. Amma heç vaxt tam qane olmuram, həmişə daha çoxunu istəyirəm, xüsusilə də peşəkar səviyyədə. Qələbə qazandıqca, o hissi yenidən yaşamaq istəyirsən. Məhz buna görə hələ də motivasiyam və qələbə aclığım var.”

Futboldan kənar həyatı barədə:

“Meydandan kənarda istədiyim hər şeyə nail olmuşam: gözəl bir ailəm, həyat yoldaşım və üç övladım var. Mənim üçün ən vacib şey budur – artıq başqa heç nəyə ehtiyacım yoxdur. Həyat yoldaşımla birlikdə uşaqlarıma düzgün dəyərlər aşılamaq istəyirik – hörmətli və təvazökar olmalarını. Valideynlərim bizə necə öyrətmişdisə, biz də eyni prinsipləri ötürmək istəyirik. Sahib olduğum hər şey üçün çox xoşbəxt və minnətdaram.”

“Milan” azarkeşlərinə mesajı:

“Burada olmaqdan həqiqətən çox sevincliyəm. Sizi “San Siro”da görmək üçün səbirsizlənirəm. Ümid edirik ki, bu mövsüm sizi sevindirəcək anlar yaşadacağıq, uğurlar qazanacağıq və birgə çox sayda qələbəni qeyd edəcəyik. Forza Milan!”