“Nyukasl” və “Norviç”in sabiq qapıçısı Tim Krul karyerasını başa vurdu.

90plus.az xəbər verir ki, sabiq Premyer Liqa qapıçısı Tim Krul peşəkar futbol karyerasını başa vurduğunu açıqlayıb. 37 yaşlı niderlandlı qolkiper demək olar ki, 20 ilə yaxın davam edən peşəkar karyerasına nöqtə qoyub.

Krul Premyer Liqada əsasən “Nyukasl Yunayted” və “Norviç Siti” klublarının heyətində ümumilikdə 222 oyun keçirib, 51 “quru oyun”a imza atıb və 371 qol buraxıb. Klub səviyyəsindəki sabit çıxışı ona Niderland millisində 15 oyun keçirməyə imkan verib. Xüsusilə 2014-cü il dünya çempionatında Kosta-Rikaya qarşı penaltilər seriyasında əvəzetmədən meydana daxil olaraq iki penalti xilas etməsi yadda qalan anlardan biri olub.

Krul sonuncu dəfə “Luton Taun” klubunun heyətində çıxış edib və ötən mövsümün sonunda bu komandadan ayrıldıqdan sonra klubsuz qalmışdı. O, həmçinin 2013-cü ilin noyabrında “Tottenhem”ə qarşı oyunda David de Xeayla birlikdə Premyer Liqa tarixində bir oyunda ən çox seyv edən qapıçı rekordunu paylaşır.

Tim Krul bu barədə şəxsi “Instagram” hesabında paylaşım edib:
“20 inanılmaz ildən sonra əlcəklərimi çıxarıram və bu yolda keçdiyim bütün anları dəyərləndirirəm. 17 yaşımda ‘Nyukasl’a qoşulmaqdan tutmuş, Niderland millisində çıxış etməyə qədər bir çox arzum gerçək oldu. Hər oyun, hər məşq və yaşadığım hər duyğu məni bu günkü şəxsiyyətimə çevirdi. Klublara, məşqçilərə, komanda yoldaşlarıma, ailəmə və xüsusilə də azarkeşlərə təşəkkür edirəm. Karyeram boyunca dəstəyiniz üçün minnətdaram. Yeni macəralar məni gözləyir, amma meydanda qazandığım xatirələri hər zaman xatırlayacağam.”