ABŞ-dan İran azarkeşlərinə və futbolçularına viza qadağası: Dünya Çempionatı ətrafında qalmaqal yarandı.

90plus.az xəbər verir ki, ABŞ-da keçiriləcək Dünya Çempionatına qatılmaq istəyən İran azarkeşləri ciddi problemlə üzləşə bilər. Argentinanın Diario Ole nəşrinin məlumatına görə, ABŞ hakimiyyəti İran vətəndaşlarına viza verilməsindən imtina etməyi planlaşdırır və bu qərar təkcə azarkeşlərə deyil, bəzi futbolçulara da şamil oluna bilər.

Mənbənin yazdığına əsasən, İran Futbol Federasiyasının prezidenti belə ötən həftə keçirilmiş Dünya Çempionatının püşkatma mərasimi üçün ABŞ vizası ala bilməyib. Bu fakt vəziyyətin nə qədər ciddi olduğunu açıq şəkildə göstərir.

Qeyd olunur ki, ABŞ-ın bu mövqeyi ölkənin miqrasiya və təhlükəsizlik siyasəti ilə bağlıdır. Belə ki, İran vətəndaşlarına, eləcə də “təsdiqlənməmiş qurumlarda” hərbi xidmət keçmiş şəxslərə viza verilməsi praktiki olaraq mümkünsüzdür. Bu kateqoriyaya bəzi iranlı futbolçuların da düşə biləcəyi iddia olunur.

Məsələ ətrafında ən böyük narahatlıq isə Dünya Çempionatının əsas prinsiplərindən biri olan azad iştirak və azarkeş hüquqlarının pozulması ehtimalıdır. Hələlik FIFA və ABŞ tərəfi mövzu ilə bağlı rəsmi açıqlama verməyib.

Vəziyyətin necə inkişaf edəcəyi və İran millisinin turnirdə iştirakı ilə bağlı hansı çətinliklərin yaranacağı yaxın dövrdə daha aydın olacaq.