Tunis millisi baş məşqçisini istefaya göndərdi. Səbəb: 1:5-lik məğlubiyyətdir.

90plus.az xəbər verir ki, Tunis Futbol Federasiyası milli komandanın baş məşqçisi Sabri Lamuşi ilə yollarını ayırıb.

Bu qərarın DÇ-2026-nın qrup mərhələsinin ilk turunda İsveçə 1:5 hesablı ağır məğlubiyyətdən sonra verildiyi bildirilir.

Tunis yığması mundial öncəsi son yoxlama oyununda da Belçikaya 0:5 hesabı ilə uduzmuşdu. Beləliklə, komanda son iki matçda ümumilikdə 10 qol buraxıb.

Məlumata görə, Tunis Futbol Federasiyası uğursuz nəticələrdən sonra Sabri Lamuşini vəzifəsindən azad etmək qərarına gəlib. Fransız mütəxəssis 2026-cı ilin yanvarından milli komandaya rəhbərlik edirdi və yığmanın sükanı arxasında cəmi beş oyuna çıxmışdı.

İsveçlə görüşdən sonra keçirilən mətbuat konfransında Lamuşi məğlubiyyəti ağır şəkildə dəyərləndirib:

“Bu, çox ağır məğlubiyyətdir. Turnirə belə böyük hesablı yenilgi ilə başlamaq ağrılıdır. Həddindən artıq çox səhvə yol verdik və İsveçin hücumçuları kimi dünya səviyyəli futbolçulara qarşı bu, bağışlanmazdır”.

Bundan başqa, Tunis mətbuatının yaydığı məlumata görə, qarşılaşmadan sonra Lamuşinin oğlu ilə azarkeşlərdən biri arasında insident yaşanıb.

Qrupun ilk turundan sonra topların fərqi -4 olan Tunis millisinin növbəti oyunu Yaponiya yığmasına qarşı olacaq. Afrika təmsilçisi pley-off şanslarını qorumaq üçün qalan görüşlərdə müsbət nəticələr qazanmağa çalışacaq.