"Roma" ilə müqaviləsi bitir – Zeki Çelikə Premyer Liqa nəhənglərindən böyük maraq var.

90plus.az xəbər verir ki, mövsümün sonunda “Roma” ilə müqaviləsi başa çatacaq Zeki Çelik Avropada səs-küy yaradacaq transferə imza ata bilər. Türkiyəli futbolçunun adı xüsusilə “Mançester Siti” olmaqla, Premyer Liqanın ən güclü klubları ilə yanaşı çəkilir.

2022-ci ildən “Roma”nın heyətində çıxış edən Zeki Çelik, Gian Piero Qasperini dövründə komandanın əsas fiqurlarından biri kimi qəbul olunub. İtaliya təmsilçisi 28 yaşlı sağ müdafiəçini saxlamaq istəyir. Lakin adının nəhəng klublarla hallanması Zekini təklifləri dəyərləndirməyə və tələsik qərar verməməyə məcbur edir.

TeamTalk məlumatına görə, mövsümün sonunda azad oyunçu statusu qazanacaq Zeki Çelikə “Mançester Siti”, “Mançester Yunayted”, “Arsenal”, “Liverpul” və “Çelsi” ciddi maraq göstərir. Premyer Liqa komandalarının apardığı ilk təmaslar hələlik ilkin məlumat toplama xarakteri daşıyır və mümkün danışıqlar üçün zəmin yaradacaq.

Dəyəri 6 milyon avro olan Zeki Çelik bu mövsüm “Roma” ilə 15 oyunda meydana çıxıb və 1 qol, 1 məhsuldar ötürmə ilə yadda qalıb.