ABŞ-da basketbol dünyasında böyük qalmaqal yaşanıb.

90plus.az xəbər verir ki, məşhur məşqçi Çonsi Billaps və basketbolçu Terri Rozier idman oyunlarında qanunsuz mərc qalmaqalına görə saxlanılıb.

İstintaq zamanı müəyyən edilib ki, 2023-cü ilin mart ayında “Şarlotta Hornets” ilə “Nyu Orlean Pelikans” komandaları arasında keçirilən oyundan əvvəl Rozierin fərdi göstəricilərinə dair şübhəli mərc əməliyyatları aparılıb. Cəmi 46 dəqiqə ərzində 13 min 759 dollar məbləğində 30 mərc qoyulduğu aşkarlanıb.

Hazırda Billaps “Portlend Treyl Bleyzers” klubunun baş məşqçisidir, Rozier isə “Mayami Hit” komandasının heyətində çıxış edir. Araşdırma çərçivəsində digər şəxslərin də bu şəbəkə ilə əlaqəli olduğu ehtimal edilir.

Hadisə idman ictimaiyyətində ciddi rezonans doğurub. Mütəxəssislər bildirirlər ki, belə qalmaqallar peşəkar idmanda etimadı sarsıdır və oyunların gedişinə kölgə salır.

Federal qurumlar istintaqın davam etdiyini və yaxın günlərdə yeni saxlamaların ola biləcəyini açıqlayıb. Bu hadisə ABŞ basketbolunda mərc manipulyasiyalarına qarşı nəzarətin gücləndirilməsinin vacibliyini bir daha gündəmə gətirib.