"Nottingem Forest" hücumçusu Taivo Avoniyi bu həftə Ramazan ayında Nottingem şəhərindəki müsəlman icmasına iftar süfrəsi açdı.

90plus.az xəbər verir ki, iftar yeməyi "Nottingham Forest İnanclar Cəmiyyəti"nin təşkilatçılığı və yerli xeyriyyə təşkilatı "Himmah"ın əməkdaşlığında "Hyson Green"dəki "Himmah’s Hub"da keçirildi. Tədbirə 70 nəfər icma üzvü qatıldı, bu da Ramazanı qeyd edənlərlə digərlərini bir araya gətirərək həmrəylik və birliyin simvolu oldu.

Avoniyi tədbirə özünün də qatılıb və Nottingem sakinləri ilə, o cümlədən öz doğma ölkəsi Nigeriya ilə əlaqəli icma üzvləri ilə birgə yemək yeyib. O, tədbirdə iştirak edərək, “Mən sadəcə olaraq icmaya sevgimi paylaşmağa çalışıram. Bu ayda müsəlman qardaşlarımıza olan hörmətimi göstərməyə çalışıram. Bu, hər kəsi bir araya gətirmək üçün bir yoldur,” deyə bildirib.

Həmçinin, Avoniyi uşaqların inkişafına xüsusi diqqət yetirdiyini və gələcək nəsilləri sağlam şəkildə böyütməyi özünə hədəf qoyduğunu vurğulayıb. “Hər kəsin bir-birinə güc verə biləcəyi bir şəkildə böyümək istəyirəm. Mənim üçün hər zaman bu, əsas məqsəd olub,” deyə əlavə edib.

"Himmah" təşkilatından Uzair Hasmi Avoniyinin göstərdiyi dəstəyə minnətdarlığını ifadə edərək, “Himmah, yoxsulluq, irqi ayrı-seçkilik və təhsil bərabərsizlikləri ilə mübarizə aparan bir sosial ədalət təşkilatıdır. Bu, bizim həftə ərzində isti yemək təmin etmək üçün sponsoru tapmaqda çətinlik çəkdiyimiz bir gecədir. Taivonun cəmiyyətə bu dəyərli dəstəyinə görə çox minnətdarıq,” deyə bildirib.

Avoniyinin icma dəstəyinə olan bağlılığı yalnız Nottingem ilə məhdudlaşmır. O, Nigeriyada Taivo Avoniyi Fondu ilə gəncləri təhsil və futbol sahələrində inkişaf etdirmək məqsədilə layihələr həyata keçirir. O, həmçinin Kvara ştatı, Ilorin şəhərindəki müxtəlif sosial və təhsil layihələrinə dəstək verib.