“İnsan söz danışanda ilk olaraq özünü nəzərə almalıdır. Bu sözü sənə və ya övladına desələr xoş olar? Özün üçün uyğun görmədiyin sözü heç vaxt başqasına demə”.
90plus.az xəbər verir ki, bu fikirləri sportinfo.az-a açıqlamasında Çempionlar Liqasının əsas mərhələsində "Ayaks"a 2:4 hesabı ilə uduzduqdan sonra "Qarabağ"ın ən çox tənqid olunan futbolçusu Nəriman Axundzadənin atası Əhməd Axundov bildirib.
O, həmçinin övladı haqqında ən çox səsləndirilən “arxasında dayanan kimsə var” kimi iddialara da açıqlıq gətirib.
"And olsun Allaha o uşaq ilk günlər "Qarabağ"da nə əziyyətlər çəkib. Mənim bəzən ona göndərməyə pulum olmayıb. 12 yaşından Nəriman Bakıda qalır. Ata-ana nəvazişi görməyib. O yaşda gəlib "Qarabağ"da uşaqların içinə düşdü. İmkanım olmadı ki, Bakıda ev tutam. Anasının yanında qalsın, yeməyini yesin, rahat yerdə yatsın.
"Qarabağ"ın akademiyasında Elnur müəllim çox dəstək olub. Amma valideyin qayğısını kim əvəz edə bilər?
Onun kimi var? Dayısı, əmiləri Lənkəranda qalır. Hamısı kasıb insanlardı. Yerli camaat da yaxından tanıyır. Nərimanı tapşırmağa kimisə olmayıb.
Onun adamı kimdir? Onun adamı Allahdır. Allah istəyib gəlib "Qarabağ"a çıxıb. "Qarabağ"da bu gün də heç kimlə münasibətim yoxdur. Baş məşqçi Qurban Qurbanovla bu yaxınlarda 2 dəqiqə söhbət etmək imkanım olub. Qurban müəllim bildirdi ki, yazılanlar Nərimana təsir etməməlidir. Vəssalam".
Ata sağlam tənqidə bir söz demədiyini, amma kütləvi şəkildə Nərimanın üzərinə gedilməsini, təhqir olunmasını başa düşə bilmədiyini sözlərinə əlavə edib:
"Tənqid eləməyə bir söz demirəm. Tənqid onun xeyrinədir. Amma artıq-əskik yazmaq olmaz axı. Ayıbdır. Biz hamımız azərbaycanlıyıq. Niyə eyni millət olduğumuz halda bir-birimizə bu cür münasibət bəsləyirik? Mahir Emreli də eyni yolu keçib. Bir vaxtlar ona qarşı da belə münasibət var idi.
Açığı, Nərimanın da xaricə getməyini istəyirəm. Özünə də demişəm. Təklifləri də olub. Xeyirlisi nədirsə o da olsun.
Əlbəttə, başverənlər mənim üçün çox çətindir. Amma mən azarkeşlərə nə deyə bilərəm? Mənə elə bir insan deyiləm ki, onlara kobud cavab verim. Allah onların da köməyi olsun".
