"Qalatasaray"da yoluna davam edən Viktor Osimhen haqqında diqqətçəkən transfer iddiaları müzakirə olunmağa davam edir.
90plus.az xəbər verir ki, "Sarı-qırmızılı" komandada mövsümün sonuna qədər qalacağını bildirən Nigeriyalı hücumçu ilə bağlı son iddia, "Napoli"nin yerli radio kanalı olan "Radio Capri"yə danışan "Tuttosport"un baş redaktoru Quido Vasiaqodan gəlib.
Vasiaqo, Viktor Osimhen ilə "Mançester Yunayted" formasını geyinən Coşua Zirkzenin dəyişdirilməsi məsələsini dəyərləndirərək, "Bu, maraqlı bir fikirdir, lakin çox mürəkkəbdir" ifadələrini işlədib.
"Qalatasaray"da Mauro İkardinin zədələndiyi və mövsümü bağladığını xatırladan italyan jurnalist, buna görə də yanvar ayında bu transferin baş tutmasının çətin olduğunu bildirib.
Quido Vasiaqo, "Hazırda Nigeriyalı hücumçu türk klubu üçün həyati əhəmiyyət daşıyır" şərhini verərək, "Qalatasaray"ın qış transfer dövründə Osimhenin komandadan ayrılmasına icazə verməyəcəyini vurğulayıb.
Vasiaqo, sonda Viktor Osimhenlə bağlı transfer mövzularının yay aylarında daha mümkün olacağını qeyd edib.
"Sarı-qırmızılı" komandanın heyətində 11 rəsmi oyuna çıxan Viktor Osimhen 8 qol vurub, 5 dəfə isə assist edib.
