Peşəkar Futbol Liqasının İdarə Heyəti Misli Premyer Liqasının 14-cü turunda qatı duman səbəbindən 24-cü dəqiqədə yarımçıq dayandırılan “Qəbələ” – “Turan Tovuz” matçı ilə bağlı xüsusi iclas keçirib.

90plus.az xəbər verir ki, toplantıda oyunun nə zaman və hansı şərtlərlə davam etdirilməsi ətrafında geniş müzakirələr aparılıb. Qış fasiləsinə qədərki və fasilədən sonrakı ilk turun təqvimi artıq tam müəyyənləşdiyi, klubların öz planlamalarını qurduğu nəzərə alınaraq PFL aşağıdakı qərarları rəsmiləşdirib:

• Matçın böyük hissəsi oynanılmadığı üçün görüş yenidən, tam şəkildə keçirilsin;
• Qarşılaşma 2026-cı ildə təşkil olunsun;
• Həmin oyunda yalnız 2026-cı il üçün sifariş vərəqəsində adı olan futbolçular iştirak etsin;
• Dayandırılan oyun üzrə qüvvədə olan cəzalar Misli Premyer Liqasının növbəti turlarında tətbiq olunsun.

Beləliklə, PFL-in qərarına əsasən, “Qəbələ” – “Turan Tovuz” qarşılaşması yeni oyun statusunda növbəti ildə yenidən baş tutacaq.