"Zirə" ilə oyunlarımız çox gərgin keçir. Heç bir komanda uduzmaq istəmir”.
90plus.az xəbər verir ki, bunu “Sabah”ın baş məşqçisi Murad Musayev Misli Premyer Liqasının 27-ci turunda “Zirə”yə qarşı keçirilən oyundan sonra deyib.
Rusiyalı mütəxəssis komandasının 2:0 hesabı qələbəsini belə şərh edib: “İlk yarıda meydanın hər qarışı uğrunda mübarizə gedirdi. Fasilədən sonra matçın gedişatı bizim üçün daha yaxşı oldu. Hissənin əvvəlində qol vurduq və bundan sona oyun açıldı. Qalan dəqiqələrdə daha inamlı təsir bağışladıq. Bu cür çətin oyunda qalib gəldiyimizə görə şadam”.
O, komandasının üzvü Amin Seydiyevin qırmızı vərəqə almaq ehtimalı barədə sualı belə cavablandırıb: “İlk epizodda sarı vərəqə verildi. Bu, doğru qərar idi. İkinci, mümkün sarı vərəqə epizodunda isə həqiqətən də heç nə yox idi. Sadəcə "Zirə"nin futbolçusu səs-küy saldı. Çünki bilirdi ki, Aminin sarı vərəqəsi var idi və meydandan kənarlaşdırıla bilərdi. O ki qaldı emosiyalara, bu, hər iki tərəfdə də var idi. Emosional olmağımız matçın gərginliyindən irəli gəlir”.
Musayev sona turlar start heyətində Zurab Oçiqava şans verməsinə aydınlıq gətirib: “Onun oynaması o demək deyil ki, Abdulaye Ba və ya Bəxtiyar Həsənalızadə daim ehtiyatda oturacaq. İrazaballa Zurab yaxşı cütlükdür. Son oyunlarda qalib gəlmişik. Bu iki müdafiəçi birlikdə çıxış edib. Bəxtiyar "Şamaxı" ilə matçda əli sınmışdı. İndi gipsdədir. Banın da zədəsi var idi. Yalnız son 2-3 gündə komanda ilə birgə məşqlərə başlayıb”.
“Sabah”ın çalışdırıcısı Yusif İmanovun qarşıdakı matçlarda millinin “1 nömrə”si olması ehtimalında da söz açıb: “Bizim qapıçımız millidə “1 nömrə” olsa, buna sevinərəm. Yusif buna layiqdir. Amma son söz baş məşqçinindir. Yusif sakit olmalıdır. Bir il əvvəl o, Premyer Liqada oynamağa başladı. Bu gün artıq milliyə potensial namizəddir. Əsas odur ki, sakit olsun. Yusifin adı çox çəkildi. Onun reaksiyası xoşuma gəldi. Sakit idi və qapısında qol buraxmırdı. Qapıçının səhv etdikdən sonra təmkinliyini qoruması önəmlidir”.
Mütəxəssis Amin Seydiyevin oyun aqressiyası belə dəyərləndirib: “Bu, yəqin ki, onun güclü tərəfidir. Amin mübarizəni sevir. Futbolçu sərt oynayanda xoşuma gəlir. Amma sarı vərəqələr oyunun ayrılmaz hissəsidir”.
Murad Musayev xeyriyyə məqsədi ilə "Beşiktaş"la yoxlama oyunu keçirilməsi ehtimalından da söz açıb: “Rəhbərliklər danışıq aparır. Yəqin ki, bu görüş qarşıdakı günlərdə deyil, aprelin 20-də baş tutacaq. Hazırda bir çox oyunçularımız milliyə yollanacaq”.