“Daily Mail”: Bu il Premyer Liqada “Boxing Day”də cəmi bir oyun keçiriləcək.
90plus.az xəbər verir ki, bu il İngiltərə Premyer Liqasında “Boxing Day” (Dekabrın 26-sı) günündə yalnız bir qarşılaşma baş tutacaq. Bu qərar uzun illərdir davam edən tam bayram turu ənənəsindən uzaqlaşma deməkdir.
Qərarın əsas səbəbi sıx oyun təqvimidir. UEFA turnirlərinin genişlənməsi və İngiltərə Kubokunun yalnız həftəsonları keçirilən formatına keçidi Premyer Liqanı təqvimi yenidən tənzimləməyə məcbur edib. Liqa yayımlayıcı şirkətlərlə olan müqaviləyə əsasən, mövsüm ərzində 33 həftəsonu və 5 orta həftə turu təşkil etməlidir. Bu ilki təqvim isə “Boxing Day”i adi cümə günü kimi qəbul etməyə və yalnız bir televiziya oyunu təyin etməyə vadar edib.
Məsələ ilə bağlı müzakirələr davam etsə də, daxili mənbələr bu qərarın dəyişdirilmə ehtimalının çox az olduğunu bildirir. Hələlik həmin gün keçiriləcək yeganə qarşılaşmanın hansı olacağı müəyyənləşməyib.
Buna baxmayaraq, EFL (Çempionşip, Birinci, İkinci Liqa və Milli Liqa) ənənəni davam etdirərək dekabrın 26-da tam oyun proqramı ilə çıxış edəcək.
“Boxing Day”də futbol oynanılması İngiltərədə 1888-ci ildən bəri davam edən bir ənənədir. Hətta 1965-ci ilə qədər bəzi illərdə matçlar Milad günündə də keçirilirdi. Sonuncu dəfə “Boxing Day” cümə gününə 2014-cü ildə düşmüşdü və həmin vaxt Premyer Liqada tam tur oynanılmışdı.
Premyer Liqa ümid edir ki, gələn il “Boxing Day” şənbə gününə təsadüf edəcəyindən bayram futbolu yenidən əvvəlki halına qayıdacaq.
Qeyd: Liqa dekabr–yanvar aylarına aid televiziya oyunlarını 15 oktyabrda açıqlamağı planlaşdırırdı, lakin bu qərar hələlik rəsmi şəkildə elan edilməyib.
