“Qarabağ”ın hücumçusu: “Nyukasl”ın zəif cəhətlərindən istifadə etməyə çalışacağıq”.
90plus.az xəbər verir ki, “Qarabağ”ın hücumçusu Kamilo Duran UEFA Çempionlar Liqasının pley-off mərhələsində Bakıda İngiltərənin "Nyukasl" klubu ilə keçiriləcək oyun öncəsi fikirlərini bölüşüb.
Kolumbiyalı forvard qarşılaşmanın çətin və tarixi olacağını bildirib:
“Bilirik ki, bizi tarixi və çətin oyun gözləyir. Doğma azarkeşlərimizin qarşısında oynayacağıq. “Nyukasl” çox çətin rəqibdir. İstənilən halda, əlimizdən gələni edəcəyik ki, uğurlu nəticə qazanaq və azarkeşləri sevindirək”.
Duran İngiltərə klublarının fiziki gücünə də diqqət çəkib:
“İngiltərə klubları fiziki güclüdür və sürətli oynayırlar. Buna baxmayaraq, yaxşı hazırlaşmışıq. Onların zəif cəhətlərindən istifadə etməyə çalışacağıq”.
Hücumçu “Qarabağ”dakı çıxışını karyerasının ən uğurlu dövrü adlandırıb:
“Mənim üçün çox xoşdur. “Qarabağ”da bu yolu keçmək karyeramın ən uğurlu dönəmidir. Gəncəm və daha inamlı olmalıyam. Üzərimdə işləməli, sürətli olmalıyam. Bu keyfiyyətlərimi inkişaf etdirməliyəm”.
Kolumbiya millisində oynamaq arzusundan da danışan futbolçu hələlik dəvət almadığını bildirib:
“Bu mövsüm uğurlu keçir. Milli komandada oynamaq uşaqlıq arzumdur. Düşünürəm ki, belə davam etsə, yığmaya düşməyə daha yaxın olaram. Hamı dünya çempionatında oynamaq istəyər. Hələ ki mənə hər hansı dəvət, zəng olmayıb”.
Duran sonda pley-off matçına tam hazır olduğunu vurğulayıb:
“Ötən həftə məşqlərdə “Nyukasl”ı da düşünürdüm. Qol vurmağa hazıram”.
