Qurban Qurbanov: “Dayanmaq istəmirik, hədəfimiz maksimumdur”.
90plus.az xəbər verir ki, “Qarabağ”ın baş məşqçisi Qurban Qurbanov UEFA Çempionlar Liqasının qrup mərhələsinin 6-cı turunda Niderlandın “Ayaks” klubu ilə oyundan öncə mətbuat konfransında komandasının hədəflərindən danışıb.
Təcrübəli mütəxəssis qarşıdakı oyunun vacibliyini vurğulayıb:
“Bizim üçün önəmli matçdır. Hazırlığa çox vaxtımız olmayıb, buna görə meydanda diqqətli olmalıyıq. Qarşımızda qalib gəlmək istəyən ciddi bir rəqib var. Onlar Bakıya iki gün əvvəl gəlib və fərqli meydançada məşq edəcəklər. Biz isə yaradıcı futbol oynamağa çalışacağıq və azarkeşləri sevindirməyi hədəfləyirik”.
Qurbanov “Ayaks”ın 5 oyundan sonra xalsız olmasını “ən təhlükəli məqam” adlandıraraq, komandasına güvənmənin vacib olduğunu bildirib. Niderland mətbuatının “Qarabağ”ı üstün tərəf kimi göstərməsinə isə belə reaksiya verib:
“Bir azərbaycanlı kimi buna yalnız sevinə bilərəm. Deməli, illər ərzindəki nəticələrimiz bunu haqq edir”.
Baş məşqçi “Benfika” üzərindəki qələbəni xatırladaraq, mövsüm hədəflərinə çatdıqlarını, amma bununla kifayətlənməyəcəklərini bildirib:
“Bəlkə də bəzi hədəflərimizə çatmışıq. ‘Benfika’ üzərindəki qələbə dönüş nöqtəsi oldu, ardı gəldi. Ümumilikdə ilin yekunları yaxşıdır, amma biz dayanmaq istəmirik. Böyük futbolda uğur əldə etmək üçün etdiklərimiz bəs etmir. Daha böyük klub olmaq üçün dayanmadan inkişaf etməliyik”.
Transfer məsələləri:
Qurbanov komandasının qış transfer pəncərəsində yeni oyunçular alacağını və ya satacağını istisna etməyib:
“İlin sonunda hər komandada problemlər yaranır. Bir neçə oyunçumuz zədəlidir və yorğunluq var. Əgər yaxşı təkliflər olarsa, oyunçularımızın daha yüksək liqalara getməsinə icazə verərik. Biz də heyətimizi gücləndirmək üçün yeni oyunçular cəlb etməyi düşünürük”.
Baş məşqçi əlavə edib ki, transferlərin məqsədi komandayı daha sağlam və keyfiyyətli etməkdir:
“İmkan daxilində qışda bir neçə oyunçu gətirməyi planlaşdırırıq ki, komandamız daha dayanıqlı olsun”.
ℹ️ Qarşılaşma sabah Tofiq Bəhramov adına Respublika Stadionunda saat 21:45-də başlayacaq.
