Azərbaycan Kubokunun 1/8 finalında “Qarabağ”ın “Karvan-Yevlax” üzərində 3:0 hesablı qələbəsindən sonra hər iki komandanın baş məşqçiləri matçı dəyərləndiriblər.

90plus.az xəbər verir ki, Qurban Qurbanov bunları söyləyin: “Bu tip oyunlarda səbir və intizam nəticəni müəyyənləşdirir”.

Ağdam təmsilçisinin baş məşqçisi Qurban Qurbanov görüşün gedişatının gözlənildiyindən daha çətin keçdiyini deyib:

“Belə oyunlarda səbirli qalmaq çox vacibdir. Rəqib oyunu yaxşı oxuyurdu və bizi 80-ci dəqiqəyə qədər çətinlikdə saxladı. ‘Karvan-Yevlax’ kompakt müdafiə olunurdu, biz isə boşluq axtarırdıq ki, onları səhvə məcbur edək. Komandamın oyundakı intizamından razı qaldım. Azarkeşlərimizə də dəstəyə görə təşəkkür edirəm.”

800-cü oyun barədə: “Əgər uğurlu rəqəmlərdirsə, motivasiya verir”

Təcrübəli çalışdırıcı karyerasında 800-cü matça çıxması ilə bağlı suala da münasibət bildirib:

“Bu rəqəmləri heç vaxt özümdən hesablamıram. Sadəcə belə uğurlar insana əlavə motivasiya verir. 200-300 yaxşı oyun keçirmişəmsə, niyə də 1000-ə çatmasın? Əsas olan hər bir oyunda məsuliyyətli və intizamlı qalmaqdır.”

Avrokuboklarda buraxılan qollar: “Xüsusi səbəb görmürəm”.

Qurbanov komandasının Avropa matçlarında 65–70-ci dəqiqələrdə qol buraxması barədə statistikaya isə belə reaksiya verib:

“Bu, xüsusi bir səbəbə bağlı deyil. Bəzən rəqib həmin dəqiqələrdə daha çox hücum edir və bizi səhvə məcbur edir. Onsuz da daim deyirəm: 90 dəqiqə konsentrasiyanı itirməməliyik.”

Füzuli Məmmədov: “Futbolçularım böyük xarakter göstərdi”.

“Karvan-Yevlax”ın baş məşqçisi Füzuli Məmmədov isə məğlubiyyətə baxmayaraq komandasının oyunundan razı qaldığını bildirib:

“‘Qarabağ’a qarşı oynamaq həmişə çətindir. Rəqib səni müdafiəyə çəkilməyə məcbur edir. Amma futbolçularım sonadək mübarizə apardı. Fiziki hazırlığımız tam qaydasında deyil, 80-ci dəqiqədən sonra yorğunluq özünü göstərdi və səhvlər qaçınılmaz oldu.”

“Şansın yaranırsa, dəyərləndirməlisən”

Məmmədov komandasının hücumda imkanlarının da olduğunu vurğulayıb:

“Hər matçda yalnız müdafiə olunmaq olmaz. ‘Qarabağ’a qarşı belə bir şans yaradırsansa, onu mütləq dəyərləndirməlisən.”

Qış planları: “Heyəti mütləq gücləndirəcəyik”

Gələcək planlardan danışan mütəxəssis qış fasiləsində transferlərin olacağını təsdiqləyib:

“Qarşıda 3 oyunumuz qalıb. Onlara maksimum fokuslanacağıq. Amma heyəti gücləndirmək planımız var, imkan düşən kimi bunu etməyə çalışacağıq.”